Politike

Lleshaj komandoi veprimet e policisë kundër opozitës, do mbajë përgjegjësi –

Loading...

Ish-deputeti i Partisë Demokratike Enkelejd Alibeaj ka akuzuar dhunën policore ndaj sekretarit organizativ të PD, Sahit Dollapi.

Në një deklaratë për mediat nga selia blu, Alibeaj akuzoi ministrin e Brendshëm Sandër Lleshaj se ka komanduar veprimet e policisë gjatë protestës të së shtunës në mbrëmje.

Sipas ish-deputetit demokrat, Partia Demokratike ka informacione të mjaftueshme për të kallëzuar ministrin Lleshaj, për shkelje të ligjit të Policisë së Shtetit.

Enkelejd Alibeaj theksoi se Lleshaj është filmuar duke komanduar veprimet e policisë kundër opozitës, dhe më pas ka dalë nga dera tjetër e Drejtorisë së Përgjithshme të Policisë së Shtetit.

Deklarata e Enkelejd Alibeajt:

Partia Demokratike dënon me ashpërsi dhunën kriminale të policisë kundër protestuesve të shtunën dhe kundër sekretarit organizativ Sahit Dollapi.

Sandër Lleshaj, ky mbeturinë tranzicionit shqiptar do të mbajë përgjegjësi personale për urdhrat e paligjshëm që i ka dhënë policisë për goditjen e qytetarëve me gaz helmues luftarak dhe për përdorimin e dhunës fizike kundër protestuesve paqësorë.

Partia Demokratike disponon të dhëna të mjaftueshme për ta çuar sadistin Sandër Lleshajn para drejtësisë për shkelje flagrante të ligjit të Policisë së Shtetit!

Prokuroria duhet të nisë hetimet e menjëhershme për të provuar se urdhri për dhunën shtazarake kundër qytetarëve është dhënë nga Sandër Lleshaj me porosi të Edi Ramës.  Sandër Lleshaj, Drejtori i Përgjithshëm i Policisë Ardi Veliu, Drejtori i Policisë së Tiranës, Rebani Jaupi dhe krimineli tjetër me uniformë Arben Baro duhet të shkarkohen nga detyra dhe të hetohen menjëherë.

Ka prova filmike se Sandër Lleshaj, i cili në shkelje të ligjit komandon operacionet e policisë kundër opozitës, është duke u larguar si hajdut nga dera dytësore e Drejtorisë së Përgjithshme të Policisë së Shtetit, pasi njoftohet të shtunën në mbrëmje për zhvendosjen e protestës së opozitës.

Bashkimi ynë në marshimin e protestës sot ne oren 18:30, për zgjedhje të lira e të ndershme të garantuara nga një qeveri e përkohshme pa kryehajdutin Edi Rama, është beteja e vërtetë europiane, që e nxjerr Shqipërinë nga udhëkryqi i rrezikshëm dhe siguron stabilitet afatgjatë për vendin.

Ne jemi sot ne krah të popullit për t’i thënë Edi Ramës dhe kujtdo tjetër që ka vendosur të ndjekë rrugën e dhunës dhe të destabilitetit, se shqiptarët e bashkuar dhe opozita nuk gjunjëzohen përpara dhunës shtazarake të një qeverie që ka ardhur në pushtet me votat e blera me krimin e organizuar. /tvklan.al

Marre nga TvKlan

Loading...