I bindur që vendimi i tij për anulimin e datës së zgjedhjeve është plotësisht kushtetues, Presidenti Ilir Meta shpjegoi në të dytën dalje brenda 48 orëve se këtë akt e ndërmori për t’u dhënë mundësi palëve të gjejnë një zgjidhje, për të mos e çuar vendin në kaos.
Akuzave se ka qenë i koordinuar me opozitën për të anuluar 30 Qershorin, kreu i shtetit iu përgjigj duke dhënë detaje nga bisedat që kishte patur me Kryeministrin Rama dhe kreun e demokratëve përpara marrjes së vendimit.
Por a e ka ndërmarrë këtë vendim Presidenti Meta nën presionin e Reformës në Drejtësi, sikundër pretendon maxhoranca?
Meta komentoi edhe qëndrimin e Brukselit dhe kreut të OSBE-së Lajçak, të cilët apeluan që shqiptarët të votojnë brenda afateve ligjore. Presidenti nuk mohoi as mundësinë e shpërndarjes së parlamentit, vendim për të cilin thotë se ka ende kohë për ta shqyrtuar.
Nismën për shkarkimin e tij e sheh të lidhur me vullnetin e maxhorancës për të mos zgjidhur krizën. Po sa shanse ka që kriza të zgjidhet në këto kushte, presidenti nuk dha një përgjigje të prerë.
Kryeministri Edi Rama i është përgjigjur shkurt çdo qëndrimi që vjen nga Presidenti dhe opozita lidhur me anulimin e datës së zgjedhjeve. Ai vijon t’i qëndrojë bindjes se procesi elektoral për të zgjedhur drejtuesit lokalë do të mbahet më 30 Qershor. Këtë e ka bërë sërish me një postim në rrjetet sociale.
I pyetur për këtë pas takimit që pati me kryetarin e Grupit Parlamentar të Partisë Social-Demokrate në Bundestag, kreu i grupit parlamentar socialist, Taulant Balla tha se Presidenti nuk ka asnjë shans të pengojë zhvillimin e zgjedhjeve
Zhvillimet në Shqipëri deputetët gjermanë i diskutuan edhe me kryeparlamentarin Gramoz Ruçi. Lidhur me vendimin e Presidentit Ilir Meta për të anuluar datën e zgjedhjeve ka reaguar edhe Departamenti i Shtetit. Në një koment për “Zërin e Amerikës” një zëdhënës i departamentit tha se Uashingtonit është duke ndjekur zhvillimet në Shqipëri dhe po mban kontakt me aktorët përkatës lidhur me ndikimet ligjore të njoftimit të Presidentit.
Një zëdhënës i Departamentit të Shtetit, i pyetur nga Zëri i Amerikës lidhur me vendimin e presidentit Ilir Meta për të anuluar datën e zgjedhjeve të 30 qershorit, tha se Departamenti i Shtetit është duke ndjekur zhvillimet në Shqipëri dhe po mban kontakt me aktorët përkatës lidhur me ndikimet ligjore të njoftimit të presidentit. Departamenti i Shtetit, tha zëdhënësi, do të vazhdojë të ndjekë dhe vlerësojë situatën që është në zhvillim e sipër.
Lidhur me gjendjen politike në Shqipëri, zëdhënësi tha se qëndrimi i Uashingtonit mbetet i njejtë, duke u bërë thirrje të gjitha palëve të shmangin konfrontimet dhe të bashkëpunojnë në mënyrë konstruktive për të ardhmen e Shqipërisë.
Partitë e opozitës, tha zëdhënësi, duhet të gjejnë një rrugë për të hapur dialogun me qeverinë rreth reformës elektorale./VOA
Presidenti Ilir Meta tha se ka pasur disa takime me Kryeministrin Edi Rama, jashtë syrit të opinionit publik dhe sipas kreu të shtetit, ai e dinte mirë shqetësimin e tij për situatën politike në vend. Meta tha se duhet të kishte qenë vetë Kryeministri që duhet të kishte kërkuar shtyrjen e zgjedhjeve.
“Kemi patur një drekë sekrete. Kemi pasur disa, por e fundit në Pallatin e Brigadave para 10 ditësh ndoshta, ku kemi biseduar dhe ku ai e di shumë mirë dhe e ka ditur gjithmonë se sa i shqetësuar jam unë për këtë situatë dhe për tejkalimin e saj. Sigurisht që i takonte atij si kryeministër që të kërkonte një datë tjetër për zgjedhje vendore. Unë që në 24 Maj, publikisht kam shprehur gatishmërinë time për t’i shërbyer një zgjidhje pas dakordësimit të palëve për të shfuqizuar datën 30 Qershor dhe për të gjetur zgjidhje për një datë tjetër”.
Por Meta tha se “për fat të keq kjo kërkesë e imja për dialog për arsyetim të përbashkët në interes të vendit nuk ka funksionuar dhe dy tre ditë përpara se të merrej ky vendim, Edi Rama ka qenë në një emision televiziv dhe ka bërë të qartë që pala e tij nuk e vë në diskutim datën 30 Qershor”.
“Nuk kam bërë ndonjë tentativë për të komunikuar me Ramën atë ditë, sepse ai më ka nderuar, ka vizituar vendin tim të origjinës sime, Skraparin dhe ka qenë edhe në Berat, për të marrë pjesë në mitingun që do të zhvillohej në të njëjtën kohe me protestën e PD. E vërteta është që kam bërë një përpjekje për të takuar Ruçin, por ai ka qenë duke udhëtuar drejt Tepelenës. Kjo është e gjithë historia përse zoti Rama nuk ka qenë i surprizuar nga vendimi im. Unë jam i surprizuar nga reagimi i tij pas këtij vendimi, megjithatë ka kohë të reflektojë”, tha Presidenti./tvklan.al
Presidenti i Republikës, Ilir Meta, tha të martën në një konferencë për shtyp nga Presidenca, se Shqipëria ka zero shanse për hapjen e negociatave pa zgjidhur krizën politike.
“Po jua them këtu juve dhe të gjithë shqiptarëve, zero janë mundësitë, pa e zgjidhë këtë krizë, jo vetëm për të çelë negociatat tani në fund të Qershorit, por as në Shtator, por edhe për shumë vite të tjera perspektiva europiane e Shqipërisë nuk dot ë duket në horizont. Unë këto i them me përgjegjësi, sepse jam zgjedhur për t’i thënë popullit shqiptar disa gjëra edhe të vërteta, kur të tjerët nuk ua thonë për arsyet e tyre.”
Meta tha se “iniciativa e fundit kundër Presidentit është një shantazh, një presion, që i bëhet institucionit më të lartë të shtetit, kryetarit të shtetit, pse? Sepse bën një përpjekje për të dhënë mundësi që kolonat mbi të cilat ndërtohet Republika e Shqipërisë dhe Kushtetuta, të mos tronditen dhe të mos rrëzohen. Pluralizmi politik, zgjedhje të lira, uniteti i popullit e kështu me radhë.”
Kreu i shtetit tha se ka një dallim të madh mes zgjedhjeve dhe votimeve. Ai tha se votime ka pasur 45 vjet në Shqipëri, por jo zgjedhje,teksa dha një mesazh edhe për ndërkombëtarët.
“Në qoftë se ka ndonjë evropian, apo amerikan që do të shikojë dhe monitorojë zgjedhje të tilla (pa opozitë), le të shkojnë në Korenë e Veriut, të marrin vesh kur i kanë ata zgjedhjet se në Shqipëri zgjedhje të tilla nuk mund të ketë më. Njoftojini të gjithë, brenda dhe jashtë vendit, se këtu, ka ardhur pluralizmi politik që në Dhjetor 1990. Duhet t’i binden të gjithë vullnetit të popullit për bashkëjetesë demokratike dhe integrim europoian.” /tvklan.al
Iniciativës së mazhorancës për shkarkim të Presidentit të Republikës, Ilir Meta, pas vendimit të tij për të shfuqizuar dekretin për zgjedhjet e 30 Qershorit, Presidenti u është përgjigjur me një sfidë, “zgjidhim krizën, unë presidenti largohet”.
“Unë nuk e kuptoj pse duan të më shkarkojnë. Unë jam vetëofruar siç e dini edhe ju, që nga deklarata e Pogradecit dhe në vazhdimësi për ta lënë këtë detyrë, postin tim, dhe gjithmonë i gatshëm që kjo sakrificë të bëhet në emër të një zgjidhje të kësaj krize dhe që gjithçka të funksionojë normalisht dhe në mënyrë demokratike në vend. Nuk e kuptoj, u intereson zgjidhja e krizës apo shkarkimi i Presidentit? Po qe se u intereson shkarkimi i Presidentit kjo është shumë e lehtë. Hajde zgjidhim krizën, ikën Presidenti. Nuk ka asnjë problem.”
Ndërsa lidhur me aludimet se është ndikuar nga Basha, Berisha, apo qoftë edhe Monika Kryemadhi, Meta tha: “Për sa i takon çështjes nëse vendimi është influencuar nga Basha dhe nga Berisha, ja po e shtoj edhe unë këtë nga Monika, nëse dikush nuk donte ta thoshte për etikë. Absolutisht. Zoti Basha këtë vendim e ka marrë vesh në orën 7:10 apo 7:15, përmes një telefonate zyrtare. Për dijeninë tuaj, Basha nuk e ka ditur, por le ta marrë vesh tani, ajo bisedë është e regjistruar përmes sekretarisë telefonike. Ku i është kërkuar të ndërpritet mitingu në çdo moment që do të kishte manifestime dhune.”/tvklan.al
“Me bindje të plotë dhe të pa lëkundur, mora vendimin e duhur për të shmangur një konflikt civil në vend dhe për të shpëtuar demokracinë në vend”.
Kështu u shpreh Presidenti i Republikës, Ilir Meta në një konferencë për shtyp këtë të martë, pas vendimit për çdekretimin e datës së zgjedhjeve vendore më 30 Qershor.
Ai tha se “vendimmarrja e Presidentit u bë e domosdoshme në kushtet e përshkallëzimit të ndërsjelltë, të veprimeve histerike, për rritjen e tensionit në vend”.
Presidenti siguroi se zgjedhjet për pushtetin vendor do të bëhen në një datë të mëvonshme dhe në respekt me frymën e Kushtetutës. Ai u bëri sërish thirrje palëve për gjetjen e një zgjidhje për daljen nga kriza./tvklan.al
13 vende anëtarë të Bashkimit Europian kanë ndërmarrë një nismë që synon bindjen e vendeve të tjera të bllokut për çeljen brenda Qershorit të negociatave për Shqipërinë dhe Maqedoninë e Veriut.
Sipas Euractiv, një platformë mediatike shumë pranë Brukselit, në këtë nismë bëjnë pjesë Italia një nga themeluesit e BE, Polonia, Austria, Kroacia, Çekia, Sllovakia, Sllovenia, Hungari, Bulgaria, Lituania, Letonia, Estonia dhe Malta.
Drafti do t’u paraqitet ambasadorëve të vendeve anëtarë të mërkurën në Bruksel.
Duke cituar një diplomat nga 13 vendet nismëtare, Euraktiv raporton se kjo, nismë “është një formë presioni për të treguar se dilema që ka BE, e shtyrë përpara kryesisht nga Franca, se fillimisht Unioni ka nevojë për riformatim të brendshëm e më pas duhet të zgjerohet, është i artificial dhe i gabuar.
“Nëse këto procese nuk shkojnë bashkë, BE do të përballet me Ballkanin Perëndimor sërish, veçse fatkeqësisht në një mënyrë më të dhimbshme për të dyja palët. Është gjithnjë e më e vështirë të kuptojmë këtë dilemë artificiale, pasi po këtu po flasim për hapje negociatash dhe jo zgjerim të tanishëm”.
Skeptike është edhe Holanda, ndërsa çelja e negociatave për Shqipërinë dhe Maqedoninë e Veriut ka ndarë më dysh edhe koalicionin e madh qeverisës në Gjermani. Grupi CDU/CSU ku bën pjesë edhe kancelarja Merkel është pro shtyrjes së vendimit për në vjeshtë. Ndërsa ministri social-demokrat i shtetit për Punët e Jashtme, Michael Roth, thotë Tirana dhe Shkupi i kanë plotësuar kushtet dhe se BE duhet të mbajë premtimin e dhënë për çeljen e negociatave në Qershor.
20 dhe 21 Qershori janë datat kur Këshilli Europian do të mblidhet të japë vërdiktin për Shqipërinë dhe Maqedoninë e Veriut.
13 vende anëtarë të Bashkimit Europian kanë ndërmarrë një nismë që synon bindjen e vendeve të tjera te bllokut për çeljen brenda qershorit të negociatave për Shqipërinë dhe Maqedoninë e Veriut.
Sipas Euractiv, një platformë mediatike shumë pranë Brukselit, në këtë nismë bëjnë pjesë Italia një nga themeluesit e BE, Polonia, Austria, Kroacia, Çekia, Sllovakia, Sllovenia, Hungari, Bulgaria, Lituania, Letonia, Estonia dhe Malta.
Drafti do t’u paraqitet ambasadorëve të vendeve anëtarë të mërkurën në Bruksel.
Duke cituar një diplomat nga 13 vendet nismëtare, Euraktiv raporton se kjo, nisme “është një formë presioni për të treguar se dilema që ka BE, e shtyrë përpara kryesisht nga Franca, se fillimisht Unioni ka nevojë për riformatim të brendshëm e më pas duhet të zgjerohet, është i artificial dhe i gabuar.
“Nëse këto procese nuk shkojnë bashkë, BE do të përballet me Ballkanin Perëndimor sërish, veçse fatkeqësisht në një mënyrë më të dhimbshme për të dyja palët. Është gjithnjë e më e vështirë të kuptojmë këtë dilemë artificiale, pasi po këtu po flasim për hapje negociatash dhe jo zgjerim të tanishëm”.
Skeptike është edhe Holanda, ndërsa Çelja e negociatave për Shqipërinë dhe Maqedoninë e Veriut ka ndarë më dysh edhe koalicionin e madh qeverisës në Gjermani. Grupi CDU/CSU ku bën pjesë edhe kancelarja Merkel është pro shtyrjes së vendimit për në vjeshtë. Ndërsa ministri social-demokrat i shtetit për punët e jashtme, Michael Roth, thotë Tirana dhe Shkupi i kanë plotësuar kushtet dhe se BE duhet të mbajë premtimin e dhënë për çeljen e negociatave në qershor.
20 dhe 21 qershori janë datat kur Këshilli Europian do të mblidhet të japë vërdiktin për Shqipërinë dhe Maqedoninë e Veriut.
Partia Demokratike vijon akuzat në emër të kryeministrit Edi Rama. Sekretari i Përgjithshëm i Partisë Demokratike, Gazmend Bardhi në një deklaratë për mediat tha se Rama është personi më i rrezikshëm në vend. “Edi Rama njeriu më i rrezikshëm në vend. Për pushtetin e tij kriminal, është gati të sakrifikojë rendin kushtetues, demokracinë dhe paqen sociale”.
Deklarata e plotë
Edi Rama është sot njeriu më i rrezikshëm për stabilitetin e vendit, për funksionimin e shtetit ligjor dhe sigurinë e qytetarëve. Ai po provon çdo ditë se për pushtetin e tij personal, të blerë në bashkëpunim me krimin e organizuar, është gati të sakrifikojë gjithçka, rendin kushtetues, demokracinë, paqen sociale. Kryeministri ilegjitim i bandës së Avdyljave ka përqendruar çdo pushtet në dorën e tij ose duke i asgjësuar institucionet, ose duke i marrë ato nën kontroll.
Edi Rama ka asgjesuar Gjykatën Kushtetuese, ka asgjesuar Gjykatën e Lartë, ka asgjesuar Prokurorin e Përgjithshëm, ka marrë nën kontroll organet e reja të drejtësisë, përdor si instrumenta politikë kundër kundërshtarëve politikë Shërbimin Informativ të Shtetit dhe Policinë e Shtetit, përdor si kamikazë kundër zgjedhjeve të lira e të ndershme anëtarët e Komisionit Qendror të Zgjedhjeve.
Përgjimet tronditëse, të publikuara pak ditë më parë nga gazeta gjermane BILD, provuan se Edi Rama e mori dhe e mban pushtetin vetëm me ndihmën e krimit të organizuar dhe të bandave. Përgjimet faktuan çdo denoncim të bërë nga Partia Demokratike këto 6 vjet se për të ardhur në pushtet, Edi Rama bëri marrëveshje me krimin e organizuar dhe e shndërroi Shqipërinë në një narkoshtet në mes të Europës. Pakti i tij me krimin është arsyeja madhore që na ka mbyllur derën e Europës dhe po rrezikon rikthimin e vizave për shqiptarët.
Pakti i Edi Ramës me krimin është pakt për të vjedhur Shqipërinë. Bashkë me një grusht oligarkësh, ai e ka kthyer Shqipërinë në pronë private të tij, ku pasuritë dhe buxheti i Shtetit është në dorën e pak njerëzve që kanë lidhje të ngushta me Kryeministrin e dalë nga vota e blerë nëpërmjet avdyljave në të gjithë Shqipërinë. Është pakti i Edi Ramës me krimin dhe një grusht oligarkësh, arsyeja kryesore që ka rrënuar ekonominë, ka larguar investitorët e huaj dhe ka mbyllur me mijëra biznese të ndershme shqiptare, duke rritur papunësinë, duke penguar hapjen e vendeve të reja të punës, duke detyruar me qindra mijëra shqiptarë të largohen pa shpresë nga vendi i tyre.
Për shkak të paktit të Edi Ramës me krimin, Shqipëria ndodhet sot në një udhëkryq të rrezikshëm, në të cilin demokracia dhe e drejta themelore e qytetarëve për të zgjedhur të lirë qeverisjen që duan, është drejt asgjesimit të plotë. Ne nuk do ta pranojmë kurrë që Edi Rama të destabilizojë Shqipërinë, të instalojë në vend një diktaturë të re të krimit dhe oligarkisë, dy instrumentat e tij kryesorë për t’u pasuruar në mënyrë të paligjshme dhe për të ruajtur më dhunë pushtetin e tij të kriminalizuar.
Së bashku me elitën e shoqërisë, me qytetarët që duan ndryshimin e këtij sistemi të kalbur nga krimi dhe korrupsioni, së bashku me rininë që e do Shqipërinë si gjithë Europa, ne po krijojmë Aleancën e vlerave, Aleancën me Qytetarët për Mbrojtjen e Demokracisë dhe Rendit kushtetues.Së bashku me elitën e shoqërisë, me qytetarët që duan ndryshimin e këtij sistemi të kalbur nga krimi dhe korrupsioni, së bashku me rininë që e do Shqipërinë si gjithë Europa, ne do të mbrojmë parimet dhe vlerat themelore të demokracisë dhe shtetit të së drejtës, do t’i garantojmë vendit zgjedhje të lira e të ndershme.
Përmes reformave të thella politike, kushtetuese dhe zgjedhore ne do t’i japim fund njëherë e mirë modelit kriminalo-autokratik të Edi Ramës, që përqendroi të gjitha pushtetin dhe pasuritë e vendit në një grusht pushtetarësh të korruptuar, oligarkësh grabitqarë dhe bandash mafioze. Boll më me Shqipërinë që duan ata, tani është koha për Shqipërinë e të gjithë shqiptarëve.
